Zelensky: Zhvillime të reja mbi garancitë e sigurisë për Ukrainën priten në ditët në vijim

Ndërsa Ukraina dhe aleatët e saj perëndimorë përpiqen të hartojnë një arkitekturë sigurie që do të parandalojë çdo sulm të ri nga Rusia në rast të një armëpushimi të ardhshëm, presidenti ukrainas Volodymyr Zelensky ka njoftuar se zhvillime të reja mbi këtë çështje pritet të ndodhin shumë shpejt.

“Në ditët në vijim”, shkroi ai në një postim në X, duke iu referuar diskutimeve të fundit me kryeministrin e Holandës, Dick Schoof. “Aktualisht, ekipet e Ukrainës, Shteteve të Bashkuara dhe partnerëve evropianë po punojnë në arkitekturën e tyre. Të gjitha zhvillimet do të jenë gati në ditët në vijim.”

Në këtë drejtim, Sekretari i Shtetit i SHBA-së, Marco Rubio, dhe Shefi i Stafit të Zyrës Presidenciale të Ukrainës, Andriy Yermak, u takuan më 22 gusht për të diskutuar më tej planin e sigurisë pas luftës. Ky takim erdhi pas bisedimeve të drejtpërdrejta midis Zelensky-t dhe Presidentit amerikan Donald Trump në Shtëpinë e Bardhë në fillim të javës.

Në takimin e 22 gushtit morën pjesë edhe përfaqësues të lartë nga Mbretëria e Bashkuar, Franca, Gjermania, Italia dhe Finlanda, përfshirë këshilltarët e tyre të sigurisë kombëtare, si dhe përfaqësues nga NATO dhe Komisioni Evropian. Ekipet pritet të kenë një plan të plotë deri në fund të javës së ardhshme.

Por në anën tjetër, Ministri i Jashtëm rus Sergey Lavrov ka deklaruar se çdo diskutim për garancitë e sigurisë për Ukrainën “nuk mund të ndodhë pa pjesëmarrjen e Rusisë”. Ai ka hedhur poshtë çdo ide për stacionimin e trupave të huaja në Ukrainë, duke thënë se kjo do të përbënte “ndërhyrje ushtarake të huaj”, të cilën Moska nuk do ta pranojë.

Ndërkohë, Zelensky ka shprehur skepticizëm për angazhimin e Rusisë në përpjekjet për paqe. “Rusia nuk po tregon asnjë qëllim për paqe nga ana e saj dhe vazhdon të bombardojë qytetet tona,” shkroi ai në X. “Ne i interpretojmë të gjitha sinjalet që vijnë nga Moska këto ditë në të njëjtën mënyrë. Nevojitet presion për të ndryshuar qëndrimin e tyre, si dhe një takim në nivelin më të lartë për të diskutuar të gjitha çështjet.”

Në një linjë të ngjashme, presidenti i Finlandës, Alexander Stubb, deklaroi: “Ata (Rusia) duan të vazhdojnë luftën të paktën deri në vjeshtë për të maksimizuar fitimet e tyre territoriale.”