Turqia kundërshton me vendosmëri planin e zhvendosjes së Trump për Rripin e Gazës

Presidenti turk Recep Tayyip Erdogan ka kundërshtuar me vendosmëri planet e SHBA-së për të zhvendosur palestinezët nga Rripi i Gazës – dhe në vend të kësaj i ka bërë thirrje Izraelit të rindërtojë zonën bregdetare të shkatërruar gjerësisht.

“Nga këndvështrimi ynë, propozimet që synojnë të zhvendosin palestinezët nga toka ku ata kanë jetuar për mijëra vjet nuk duhen marrë seriozisht”, tha Erdogan në një konferencë në kryeqytetin e Malajzisë, Kuala Lumpur.

“Askush nuk ka fuqi të shkaktojë një “Nakba” të dytë mbi popullin palestinez, dhe as nuk do të ketë kurrë”, tha ai.

Termi “Nakba”, nga arabishtja – katastrofë, i referohet ikjes dhe zhvendosjes së më shumë se 700,000 palestinezëve në luftën e parë të Lindjes së Mesme në 1948 pas krijimit të shtetit izraelit.

“Në vend që të kërkojë një vend të ri për popullin e Gazës, kryeministri izraelit Benjamin Netanyahu duhet të mbajë përgjegjësi për dëmet e shkaktuara gjatë operacionit ushtarak kundër grupit islamik palestinez Hamas, në Gazë”, tha Erdogan.

Presidenti amerikan Donald Trump përsëriti dje planet e tij shumë të kritikuara për të zhvendosur palestinezët nga Rripi i Gazës.

Trump synon të zhvendosë palestinezët dhe është i përkushtuar për të blerë dhe zotëruar Rripin e Gazës.

Dëbimi i më shumë se 2 milionë njerëzve do të binte ndesh me ligjin ndërkombëtar, ndërsa Kombet e Bashkuara kanë paralajmëruar për rrezikun e një “spastrim etnik”.