Situata në Liban, rritet frika e libanezëve që do të mbeten pa gjëra esenciale

A keni rezervuar furnizime ushqimore? Bukë, miell, konserva? Gjëra për bebe? Këto janë pyetje që qarkullojnë në mesin e shumë libanezëve, pasi një numër i madh i tyre po grumbullojnë ushqime dhe ilaçe, nga frika e mungesës në rast se Izraeli synon Aeroportin Ndërkombëtar Rafic Hariri të Bejrutit, aeroportin e vetëm të Libanit.

Siç shkruan BBC, duket se ajo që ndodhi gjatë luftës së korrikut në 2006, kur vendi u përball me mungesa të mëdha të furnizimeve ushqimore, është ende e freskët në mendjet e libanezëve. Në atë kohë, Izraeli bombardoi aeroportin e Bejrutit dhe e vuri atë jashtë funksionit, duke vendosur gjithashtu një bllokadë të rreptë në portet detare.

Ishte e dukshme sot ajo që tha kryeministri libanez Najib Mikati në lidhje me mbrojtjen e konsumatorëve.

Mikati përmendi se disa po e shfrytëzojnë situatën për të rritur çmimet dhe si përgjigje i është kërkuar Ministrisë së Ekonomisë të marrë masa të rrepta për të ndjekur këdo që përpiqet të përfitojë nga rrethanat aktuale. Sa i përket aeroportit ndërkombëtar dhe porteve detare të Bejrutit, Mikati pohoi funksionimin dhe sigurinë e tyre të vazhdueshme.