Qeveria gjermane miratoi propozimin për të inkurajuar shërbimin ushtarak vullnetar

Kabineti gjerman të mërkurën miratoi hapat për të rritur rekrutimin për forcat e armatosura të vendit dhe për të forcuar gatishmërinë ushtarake përballë tensioneve të larta midis NATO-s dhe Rusisë.

Ministri i Mbrojtjes, Boris Pistorius tha se kjo nismë synon të tërheqë vullnetarë në Bundeswehr, por propozimi përfshin gjithashtu dispozita për shërbim të detyrueshëm në rast se numri i tyre bie në vitet e ardhshme.

Nga 1 janari i vitit të ardhshëm, të gjithë të rinjve gjermanë, burra dhe gra, do t’u dërgohet një pyetësor për të vlerësuar interesin e tyre për të shërbyer, duke përfshirë pyetje mbi nivelin e tyre të fitnesit fizik, aftësitë dhe interesat.

Ndërsa burrat janë të detyruar ta plotësojnë atë, për gratë do të jetë vullnetare, sipas një projektligji që duhet të miratohet ende nga parlamenti.

Duke filluar nga 1 korriku 2027, të gjithë burrat gjermanë 18-vjeçarë do të duhet t’i nënshtrohen një ekzaminimi të detyrueshëm mjekësor, edhe nëse nuk zgjedhin shërbimin ushtarak vullnetar.