Osmani takon një zyrtar evropian një ditë pasi “sulmoi” BE-në në konferencë

Presidentja e Republikës së Kosovës, Vjosa Osmani, ka pritur sot në takim drejtorin në Shërbimin Evropian të Veprimit të Jashtëm të BE-së, Marko Makovec.

Kjo është bërë e ditur nga një komunikatë për media e presidencës.

“Në takim me Makovec, Presidentja Osmani ka theksuar se reformat e thella në sistemin e drejtësisë dhe sundimi i ligjit janë prioritete të Kosovës. Sundimi i ligjit, sipas Presidentes Osmani mbetet parakusht kryesor për suksesin e Republikës së Kosovës në çdo fushë përfshirë integrimin në BE”, thuhet në komunikatë.

Siç thotë presidenca, nga zyrtari i lartë i BE-së Makovec, Presidentja Osmani ka marrë mbështetjen për realizimin e procesit të vetingut në përputhje me standardet dhe praktikat evropiane.

“Në takim me zyrtarin e BE-së, Presidentja Osmani ka ritheksuar se Kosova tashmë ka përmbushur të gjithë kriteret dhe se BE-ja duhet ta mbajë fjalën ndaj Kosovës për liberalizimin e vizave. Më tej, Presidentja Osmani është shprehur në favor të thellimit të bashkëpunimit strategjik me BE-në në çështje politike, diplomatike dhe të sigurisë, por edhe me shtetet veç e veç”, thuhet në njoftim.

Kujtojmë se ky takim i Osmanit me këtë zyrtar të BE-së vjen pas gjuhës së ashpër të presidentes dje në një konferencë për media ndaj BE-së për Raportin e Progresit, i cili i jep vërejtje serioze qeverisë së Kosovës për procesin e vettingut.