Izraeli thotë se një ofensivë e afërt në Rripin e Gazës do të zhvendoste një milion palestinezë

Një zyrtar i lartë ushtarak izraelit tha të mërkurën se autoritetet vlerësuan se një ofensivë e afërt në Rripin e Gazës do të zhvendoste një milion palestinezë, duke planifikuar një “zonë të re humanitare” për ta.

Shumica dërrmuese e më shumë se dy milionë banorëve të Gazës janë zhvendosur të paktën një herë gjatë gati dy viteve të luftës.

Dhe ushtria izraelite është përgatitur për të pushtuar Qytetin e Gazës, qendrën më të madhe urbane të territorit palestinez, me Kombet e Bashkuara që vlerësojnë se gati një milion njerëz jetojnë në dhe përreth qytetit verior, shkruajnë mediat e huaja, përcjell Telegrafi.

Një zyrtar i lartë nga COGAT, organi i ministrisë së mbrojtjes izraelite që mbikëqyr çështjet civile në territoret palestineze, tha se ditët e fundit, “pamë një lëvizje njerëzish nga veriu në jug”.

“Deri më tani, afërsisht 70,000” banorë të Gazës u larguan nga veriu, citohet të ketë thënë zyrtari, duke informuar gazetarët në kushte anonimiteti.

Pa dhënë një afat kohor specifik, zyrtari theksoi se autoritetet izraelite prisnin që “një milion njerëz” të largoheshin nga jugu.

Në fund të gushtit, një zëdhënës ushtarak izraelit tha se evakuimi i Qytetit të Gazës ishte “i pashmangshëm”, ndërsa Kryqi i Kuq ka paralajmëruar se çdo përpjekje izraelite për ta bërë këtë do të ishte e pamundur në një mënyrë të sigurt dhe dinjitoze.

Zyrtari izraelit shtoi se “ne duam të identifikojmë një zonë humanitare” e cila do të shpallet zyrtarisht në ditët në vijim.

Zona thuhet se do të shtrihet nga një grup kampesh refugjatësh në Gazën qendrore deri në zonën jugore të al-Mawasi dhe në drejtim të lindjes.

Izraeli e kishte caktuar zonën bregdetare të al-Mawasi një zonë humanitare në ditët e para të luftës, por e ka goditur vazhdimisht që atëherë.