Don Xhoni vazhdon ta sfidojë Noizyn, shkon në Durrësin e tij

Përplasja e nënkuptuar mes Don Xhonit dhe Noizyt po merr gjithnjë e më shumë formë, dhe mbrëmja e kaluar ishte një tjetër kapitull i kësaj “gare” të heshtur por të nxehtë në skenën e hip-hop-it shqiptar.

Reperi nga Drenica, i cili prej kohësh është përfolur për “thumbat” e koduar në rrjete sociale ndaj Noizyt, mbrëmë performoi në një nga skenat më të njohura të Durrësit – qytetit ku Noizy ka ngritur perandorinë e tij muzikore dhe ku emri i tij është pothuaj sinonim me skenën urbane.

Në rrjetet sociale, Don Xhoni publikoi pamje nga koncerti i tij me dy mesazhe që u interpretuan si vazhdim i rivalitetit në distancë. Në një prej videove të postuara ai shkruan “1shi ktu”, një titull me të cilin Noizy identifikohet prej vitesh. Në një tjetër postim nga e njëjta natë, ai theksoi: “Durrësi, ça tha? Komplet bllokim – pamjet flasin vet!”, duke nënkuptuar mbushjen e plotë të vendit dhe atmosferën e zjarrtë që e shoqëroi.

Ky veprim vjen vetëm pak ditë pas shkëmbimeve të tjera simbolike mes dy reperëve në rrjet, ku statuset dhe imazhet luksoze janë shndërruar në një arenë të re për të treguar dominim.

Për momentin, asnjëri nuk e ka përmendur hapur emrin e tjetrit, por gjuha e kodeve, “thumbave” dhe mesazheve të nënkuptuara e bën këtë “duel” edhe më intriguese për fansat e muzikës rap. A do të ketë një përballje të drejtpërdrejtë apo gjithçka do të mbetet në formën e sfidës në distancë? Kjo mbetet për t’u parë.