Katastrofë në Sudan, rrëshqitja e dheut vret të paktën 1 mijë persona

Një rrëshqitje e fuqishme dheu ka lënë të paktën 1 mijë të vdekur në Malet Marra, në perëndim të Sudanit.

Siç shkruan BBC, tragjedia u shënua të dielën, 31 gusht, pas disa ditësh reshjesh të dendura shi. Këto të fundit shkaktuan shembje masive duke rrafshuar pothuajse të gjithë fshatin Tarasin, me vetëm një të mbijetuar.

Grupi rebel ka bërë apel për ndihmë humanitare nga Kombet e Bashkuara dhe organizatat rajonale e ndërkombëtare.

Shumë banorë të Darfurit të Veriut kishin gjetur strehë në Malet Marra, pasi luftimet mes ushtrisë sudaneze dhe forcave paramilitare RSF i kishin dëbuar nga shtëpitë e tyre.

Që nga prilli i vitit 2023, Sudani është zhytur në një luftë civile mes ushtrisë dhe RSF-së, duke shkaktuar uri masive, ndërsa nuk kanë munguar akuza për gjenocid.

Një zyrtar amerikan, vlerësoi vitin e shkuar se deri në 150 mijë persona kanë humbur jetën, ndërsa rreth 12 milionë janë detyruar të braktisin shtëpitë e tyre. Shumë banorë të Darfurit besojnë se RSF dhe milicitë e lidhura me të po zhvillojnë një luftë për ta kthyer rajonin në një territor të sunduar nga arabët.