Pentagoni i ndalon Ukrainës përdorimin e raketave amerikane për goditje në Rusi

Zyrtarë të mbrojtjes së Shteteve të Bashkuara kanë bllokuar Ukrainën nga përdorimi i raketave me rreze të gjatë veprimi Atacms për të sulmuar objektiva brenda territorit rus, që nga fundi i pranverës, sipas një raporti të publikuar të shtunën nga Wall Street Journal.

Ky vendim është pjesë e një përpjekjeje të administratës Trump për të bindur presidentin rus, Vladimir Putin, që të angazhohet në bisedime paqeje, raportoi gazeta.

Sipas WSJ, Pentagoni ka bllokuar përdorimin e Sistemeve të Raketave Taktike të Ushtrisë (Atacms), të prodhuara në SHBA. Dy zyrtarë amerikanë i thanë gazetës se Ukrainës i ishte refuzuar përdorimi i tyre në të paktën një rast, përmes një “mekanizmi shqyrtimi” të zhvilluar nga Elbridge Colby, nënsekretar i Pentagonit për politikën.

Ky mekanizëm rregullon përdorimin e armëve me rreze të gjatë veprimi të SHBA-së dhe atyre të aleatëve evropianë, që mbështeten në inteligjencën apo teknologjinë amerikane – përfshirë edhe raketat britanike Storm Shadow, sipas dy zyrtarëve amerikanë dhe një zyrtari britanik.

Vendimet për përdorimin e Atacms i takojnë sekretarit të Mbrojtjes të SHBA-së, Pete Hegseth, thuhet në raport. Këto raketa kanë një rreze veprimi deri në 305 kilometra.

Sipas WSJ, Ukraina kishte marrë më parë leje për të përdorur këto armë brenda territorit rus në nëntor, pasi në luftë hynë trupa nga Koreja e Veriut.

Mirëpo, para marrjes së detyrës në janar, Donald Trump kishte deklaruar për Time Magazine se vendimi për të lejuar përdorimin e raketave amerikane për sulme në Rusi ishte një gabim:

“Nuk pajtohem shumë me dërgimin e raketave qindra milje në Rusi. Pse po e bëjmë këtë? Ne thjesht po e përshkallëzojmë këtë luftë dhe po e përkeqësojmë atë. Kjo nuk duhej të lejohej të ndodhte”, – ka thënë Trumpi.

Ndërkohë, sekretarja e shtypit e Shtëpisë së Bardhë, Karoline Leavitt, tha për Wall Street Journal se Trumpi “ka qenë shumë i qartë se lufta në Ukrainë duhet të përfundojë”.

Por gjatë përpjekjeve të fundit për të ndërmjetësuar bisedime mes Putinit dhe Zelenskyt, Trumpi ka pranuar se nuk mund të fitohet lufta pa goditur agresorin.

“Është shumë e vështirë, nëse jo e pamundur, të fitosh një luftë pa sulmuar vendin e një pushtuesi,” – ka shkruar ai të enjten.

“Është si një ekip i shkëlqyer në sport që ka një mbrojtje fantastike, por nuk lejohet të luajë në sulm. Nuk ka asnjë shans për të fituar”.