Kompania e aksidentuar në Gjermani: Tre persona janë me lëndime të lehta, të tjerët janë mirë

Një aksident i rëndë ka ndodhur në autostradën Salzburg-Munchen.

Në aksident është i përfshirë edhe një autobus nga Kosova ku është përplasur me një kamion.

Sipas policisë, 30 persona u lënduan në aksident. Dy pasagjerë u shtruan në spital dhe katër të tjerë u transferuan në klinika për vlerësim të mëtejshëm.

E kompania “Dubova Reisen” ka konfirmuar se një autobus i saj, me udhëtarë nga Kosova u aksidentua në Gjermani në orët e para të 20 gushtit. Nga kjo kompani thanë se vetëm tre pasagjerë kanë pësuar lëndime.

“Fatmirësisht, pasagjerët janë mirë, vetëm tre nga ta janë me lëndime të lehta për shkak të dëmtimit të xhamave. Aksidenti ndodhi rreth orës 00:30. Autobusi ishte në trasen e tij, një makinë ka ardhur nga e majtë, nga ana e shoferit, duke ia humbur drejtimin”, thanë nga kjo kompani për Radion Evropa e Lirë.

Ndryshe, Rosenheim 24 raportoi se autostrada u mbyll plotësisht në drejtim të Mynihut për rreth dy orë.

Kamioni, i drejtuar nga një polak 46-vjeçar, që po barte perime po udhëtonte drejt Mynihut gjithashtu.

“Autobusi, që transportonte pasagjerë nga Kosova, u përplas me pjesën e pasme të rimorkios pavarësisht manovrave të shmangies. Pjesa e përparme e autobusit u ngjit në kamion dhe pësoi dëme të mëdha. Rimorkioja u dëmtua gjithashtu rëndë”, raportoi media gjermane.