Ramadan Nishori: Pasi dola publikisht, më larguan nga banesa – pronari arsyetohej se ka me rregullu “diçka”

I mbijetuari i dhunës seksuale, Ramadan Nishori i ftuar në emisionin “Frontal” në T7 ka rrëfyer periudhën e vështirë që e ka përjetuar pas momentit kur ka dalur publikisht për të treguar përjetimin dhe statusin e tij gjatë luftës.

Nishori ka treguar për një problem që ka pasur me qiradhënësin e tij, i cili e largoi nga banesa pas daljes së tij publike, ku rrëfeu për dhunën seksuale që përjetoi nga forcat serbe gjatë luftës së fundit në Kosovë.

“Masi dola publikisht, pronari i banesës më largo inga banesa që isha me qera. Më tha po du me ndreq, por nuk ishte puna aty, gjoja se e pengoja unë. Unë i kisha 2-3 vjet aty duke banuar, ishte e re edhe e dija sa ka nevoj me e rregullu atë banesë. Më nuk kam pasur problem me qiradhënësit, ky ku banjo më ka thënë veç hyn bano se unë i rregulloj krejt. Po kam problem me shëndetin se nuk po mundem me punu”, është deklaruar ai.

Nishori ka thënë se ata që ushtruan dhunë seksuale ndaj tij kanë punuar në stacionin e Policisë të Drenasit, derisa në mesin e tyre kishte qenë edhe një shqiptar.

“Me figurë i njoh, me emra nuk ua di. Janë duke punu Policia e Prokuroria në këtë drejtim. Ata kanë punu në stacionin policor të Drenasit edhe më herët, ka qenë nga Kjeva. Të tjerët i kanë njohur më mirë se unë, se unë nuk kam pasur shumë kontakt më herët nga ta. Atë ditë ka qenë edhe një shqiptar aty, e ka pasur rolin e përkthyesit, për mua ka qenë hero se më shpëtoi atë ditë, edhe ai punonte në stacionin e Policisë në Drenas si përkthyes”, është shprehur ai.